Die woorde "profiteer" wat 'baat vind' beteken en "profeteer" wat 'die toekoms voorspel' beteken, is homofone van mekaar omdat hulle verskillend gespel word, verskillende betekenisse het, maar dieselfde uitgespreek word.
Sien ook die bladsy Homofone.

Die idioom "voel soos 'n kraai in pouvere" beteken 'baie ongemaklik voel'. Dit kom na aanleiding van die fabel van Esopus oor die kraai en die poue. Die kraai het vere opgetel van die poue wat verveer het en dit aan sy stert vasgemaak. Toe hy naby die poue kom, het hulle die bedrog agtergekom, hom gepik en sy geleende vere afgepluk. Hy moes toe terugkeer na die ander kraaie, wat ook met hom geraas het omdat hy met geleende vere wou pronk.
Sien ook die bladsy Idiome, spreuke en spreekwoorde.

Byvoeglike naamwoorde ("plat") word gewoonlik los van selfstandige naamwoorde ("sak") geskryf. Wanneer betekenisverdigting egter plaasgevind het (dit wil sê as die begrip ʼn spesifieke betekenis kry), vorm die twee begrippe ʼn eenheid en word hulle vas geskryf. 
Sien ook die bladsy Betekenisverdigting.

ʼn Homoniem is twee woorde wat dieselfde klink en dieselfde gespel word, maar heeltemal ʼn ander betekenis en oorsprong het, byvoorbeeld “klap” (‘hard teen die gesig slaan’) en “klap” (‘harde plofgeluid’).
Sien ook die bladsy Homonieme.