Indien ʼn woordgroep van drie of meer woorde ("kaas", "en" en "ham") wat op sigself nie gekoppel word nie, in ʼn samestelling optree saam met ʼn bykomende woord of woorde ("toebroodjie"), word koppeltekens tussen al die samestellende dele van die oorspronklike woordgroep geskryf en word die bykomende woord met of sonder ʼn koppelteken vas aan die res geskryf (AWS 12.21).
Sien ook die bladsy Koppeltekens.

In 'n sin met 'n voorwerp is die werkwoord oorganklik, byvoorbeeld: Die toeriste besoek die kasteel. 'n Mens kan dit vasstel as daar 'n antwoord op die vraag "Wat?" na die werkwoord is. Indien die sin nie 'n voorwerp het nie, is die werkwoord onoorganklik, byvoorbeeld: Die toeriste toer heeldag lank.
Sien ook die bladsy Woordsoorte.

As dit baie goed gaan met jou, sê ons in die idioom jy leef in die land Kanaän. Ons kan ook sê jy leef in die land van Kokanje, of in die land van melk en heuning. Die deelteken word op die derde "a" geskryf om die uitspraak korrek weer te gee.
Sien ook die bladsy Idiome, spreuke en spreekwoorde.

In Afrikaans skryf ons Mandaryns met 'n s, anders as in Engels waar dit nie op 'n s eindig nie. Nog so 'n voorbeeld is Latyn.
Sien ook die bladsy Taalbenamings.