'n Sog is 'n vroulike vark en die meervoudsvorm daarvan kan "sogge" of "sôe" wees. By sommige woorde wat eindig op 'n "g", kan een van die moontlike meervoudsvorme gevorm word deur die toevoeging van 'n "-e" aan die einde van die woord, tesame met die weglating van die "g" en die toevoeging van 'n kappie op die vokaal wat die "g" voorafgegaan het. Ander voorbeelde sluit in "brug" wat "brûe" word en "wig" wat "wîe" word.

Sien ook die bladsy Meervoudsvorme.

Aangesien die "i" in "wissel" kort en beklemtoon is, word dit gevolg deur 'n dubbel-"s".
Sien ook die bladsy Konsonantverdubbeling.

'n Saamgestelde taalbenaming bestaande uit die naam van 'n gebruikersgroep plus 'n basiese taalnaam (bv. "Oranjerivierafrikaans") word sonder 'n koppelteken vas geskryf. Die koppelteken in "Griekwa-afrikaans" of "Griekwa-Afrikaans" word genoodsaak deur die opeenvolging van vokaalletters wat tot verskillende lettergrepe behoort.
Sien ook die bladsy Koppeltekens.

In 'n oop of geslote eindlettergreep van verafrikaanste leenwoorde wat reeds lank gelede aan Afrikatale ontleen is, word die klank [i] met die letters "ie" weergegee. Die spelling "mopani" kom wel soms voor, maar "mopanie" is meer gevestig en word in die AWS as enigste spelvorm erken.
Sien ook die bladsy Afrikataalleenwoorde.