Dubbelaanhalingstekens kan gebruik word om direkte rede aan te dui. Die punt wat die sin in die direkte rede afsluit, word voor die laaste dubbelaanhalingsteken geskryf.
Sien ook die bladsy Aanhalingstekens.

Wanneer 'n naamwoord plus 'n werkwoord betekenisverdigting ('n woordgroep wat met verloop van tyd 'n gespesialiseerde betekenis verkry het wat verskil van die oorspronklike groep) ondergaan het, word die verbinding vas geskryf.
Sien ook die bladsy Betekenisverdigting.

'n Ampsbenaming ("direkteur-generaal") wat na 'n individu verwys, of die naam van 'n instelling ("behuising"), begin tradisioneel met 'n hoofletter. Sedert die 2009-AWS is daar egter geen definitiewe reël meer hieroor nie; dit is dus moontlik om dit met 'n hoof- of kleinletter te skryf.
Sien ook die bladsy Aanspreekvorme.

Die idioom, "die ou profete is dood en die jonges eet brood," beteken dat 'n mens nie op enigeen se voorspelling kan staatmaak nie. Dit is moontlik ontleen aan die Bybel (Amos 7:12) waar Amasia eis dat Amos na Juda moet gaan en daar brood eet en profeteer.
(Bron: Spreekwoorde - Anton Prinsloo)
Sien ook die bladsy Idiome, spreuke en spreekwoorde.