Die woord "belde" is die meervoud van sowel "belt" (die oorspronklike Engelse leenwoord) as "beld" (die eweneens aanvaarde verafrikaanste weergawe daarvan). Klankverwarring kom dikwels voor tussen "t" en "d" aan die einde van 'n woord, aangesien albei in Afrikaans as stemloos (d.w.s. as [t]) uitgespreek word. Deur te luister na die verboë vorm van so 'n woord (byvoorbeeld die meervoud), kan normaalweg bepaal word of dit met 'n "t" of 'n "d" gespel moet word. Beide die enkelvoudsvorme "belt" en "beld" word egter in hierdie uitsonderlike geval aanvaar.
Sien ook die bladsy Klankverwarring.

In die idioom "kaatjie van die baan" is "kaatjie" die kern en neem dus die meervoud: "kaatjies van die baan".
Sien ook die bladsy Meervoudsvorme.

Mense wat van Haiti (of Haïti) kom, noem jy "Haitiane" (of "Haïtiane") met "Haitiaanse" (of "Haïtiaanse") gewoontes.
Sien ook die bladsy Afleidings van eiename.

Die woord "moraal" is die Afrikaans vir die Engelse "moral" en beteken die "les" in 'n storie, die etos van 'n geloof of denkrigting of sedelike beginsels. Die byvoeglike naamwoord hiervan is "moreel" of "morele".

Die s.nw. "moreel" is die Afrikaans van die Engelse "morale" en verwys na die geesteskrag van 'n groep.

Die span se moreel is dus hoog; tieners wat die spoor byster geraak het se moraal laat veel te wense oor.

Die byvoeglike naamwoord vir al twee hierdie selfstandige naamwoorde is in Afrikaans "morele".
(Bron: VivA)
Sien ook die bladsy Twyfelwoorde (mits vs tensy).